Category: ဘောလုံးသတင်းများ

ဘောလုံးသတင်းများ ၊ အပြောင်းအရွှေ့သတင်းများ ၊ ဘောလုံးပွဲကြိုသုံးသပ်ချက်များ နှင့်အခြားသော အားကစားသတင်းများကို ပုံမှန်တင်ဆက်ပေးနေပါပြီ။

မိုဟာမက် ဆာလတ်

ဆာလတ် ဟာ ရာသီကုန်မှာ ပီအက်စ်ဂျီသို့ ပြောင်းရွှေ့တော့မယ်လို့ သတင်းထွက်

လီဗာပူးတောင်ပံကစားသမား မိုဟာမက် ဆာလက် ဟာ ရာသီကုန်မှာ အန်ဖီးလ်ကနေထွက်ခွာပြီး ပြင်သစ်ထိပ်သီးကလပ် ပီအက်စ်ဂျီသို့ ပြောင်းရွှေ့တော့မယ်လို့ သတင်းတွေထွက်ပေါ်လာခဲ့ပါတယ်။

မိုဟာမက် ဆာလတ်

လီဗာပူးနဲ့ စာချုပ်သက်တမ်းတိုးမြှင့်ဖို့ အလားအလာမရှိတဲ့ ဆာလက်ဟာ လာမယ့်ဇန်နဝါရီအပြောင်းအရွှေ့မှာပဲ ပီအက်စ်ဂျီနဲ့ အကြိုသဘောတူစာချုပ် ချုပ်ဆိုသွားဖွယ်ရှိနေတယ်လို့သိရပါတယ်။ အသက်-၃၂ နှစ်အရွယ်ကစားသမားဟာ ယမန်နေ့ညက မန်စီးတီးကို ၂-၀ နဲ့အနိုင်ရခဲ့တဲ့ ပရီးမီးယားလိဂ်ပွဲစဉ်မှာ ဂိုးဖန်တီးမှုပြုလုပ်နိုင်ခဲ့သလို၊ အနိုင်သေချာစေမယ့်ဂိုးကိုလည်း ပင်နယ်တီမှတစ်ဆင့် သွင်းယူပေးခဲ့ပါတယ်။

သို့သော်လည်း ဆာလက်ဟာ ပွဲအပြီးမှာတော့ ရာသီကုန်မှာ လီဗာပူးမှထွက်ခွာနိုင်ချေရှိကြောင်း အရိပ်အမြွက်ပြောကြားခဲ့တာကြောင့် ပီအက်စ်ဂျီသို့ ပြောင်းရွှေ့ဖို့ ဖြစ်နိုင်ချေများနေပါတယ်။ ပီအက်စ်ဂျီကလည်း အီဂျစ်သားကို ကာလရှည်စောင့်ကြည့်နေခဲ့ပြီး ခေါ်ယူဖို့အတွက် ပစ်မှတ်ထားနေခဲ့တာဖြစ်ပါတယ်။

ပြင်သစ်သတင်းစာတွေကလည်း လာမယ့်ရာသီမှာ ဆာလက်ကို လီဂူးဝမ်းမှာ မြင်တွေ့ရနိုင်ကြောင်း အပြိုင်အဆိုင်ဖော်ပြထားကြတယ်လို့သိရပါတယ်။ သို့သော် တစ်ဖက်မှာလည်း ပီအက်စ်ဂျီဟာ အသင်းရဲ့အနာဂတ်ကို ပြောင်းလဲပုံဖော်ဖို့ကြိုးပမ်းနေတာကြောင့် လူငယ်ကစားသမားလေးတွေနဲ့ သွေးသစ်လောင်းနေတယ်လို့ သတင်းတွေထွက်ပေါ်နေလို့ ဆာလက်ရဲ့အပြောင်းအရွှေ့က ယတိပြတ်ပြောလို့ရတဲ့ အနေအထားမှာမရှိသေးပါဘူး။

ဆာလက်ဟာ ၂၀၂၂ ခုနှစ်မှာ လီဗာပူးနဲ့ စာချုပ်သစ်ချုပ်ဆိုထားခဲ့ပေမယ့် အဆိုပါအချိန်ကတည်းက အသင်းမှာ ဆက်လက်နေထိုင်ဖို့ မသေချာတဲ့အခြေအနေတွေဖော်ပြထားခဲ့တာဖြစ်ပါတယ်။ ဆာလက်သာမက ဗန်ဒိုက်ခ်နဲ့ အလက်ဇန်းဒါးအာနိုးလ်တို့ကလည်း ယခုရာသီကုန်မှာပဲ လီဗာပူးနဲ့စာချုပ်သက်တမ်းကုန်ဆုံးမှာဖြစ်ပေမယ့် ၂ ဦးစလုံး စာချုပ်သစ်နဲ့ပတ်သက်ပြီး တစ်စုံတစ်ရာဆွေးနွေးမှု ပြုုလပ်ထားခြင်းမရှိသေးပါဘူး။ သတင်းတွေအရ အန်ဖီးလ်မှာထွက်ခွာနိုင်ချေရှိတဲ့ အာနိုးလ်ကို ရာသီကုန်မှာ ရီးရဲလ်မက်ဒရစ်က အလွတ်ပြောင်းရွှေ့ကြေးနဲ့ ခေါ်ယူနိုင်ချေရှိတယ်လို့ သိရပါတယ်။

ဆာလတ်

ဆာလက်အနေနဲ့ ပီအက်စ်ဂျီသို့ပြောင်းရွှေ့ဖို့ အလုပ်မဖြစ်ခဲ့ပါကလည်း ခေါ်ယူဖို့ အဆင်သင့်စောင့်မျှော်နေတဲ့ဆော်ဒီပရိုလိဂ်ကလပ်တွေရှိနေပါသေးတယ်။ ပြီးခဲ့တဲ့နှစ်က ဆော်ဒီကလပ် အယ်လ်အစ်တီဟတ်ဟာ ဆာလက်ကိုခေါ်ယူဖို့ ပြောင်းရွှေ့ကြေး ပေါင်သန်း ၂၀၀ နဲ့ကမ်းလှမ်းခဲ့ပေမယ့် လီဗာပူးကတော့ ငြင်းပယ်ထားခဲ့တာဖြစ်ပါတယ်။

Tottenham Hotspur celebrate a 4-0 win over Manchester City

မန်စီးတီး အိပ်မက်ဆိုး (ပွဲပြီးအတွေး)

ပက်ရဲ့ မန်စီးတီးဟာ စပါးကို ဖြစ်နိုင်သမျှသော အခြေအနေများစွာထဲကနေမှ အဆိုးဆုံး ပုံစံတစ်ခုနဲ့ ရှုံးနိမ့်သွားခဲ့ပြီး၊ ဂိုးပြတ်၊ အလုပ်မဖြစ်၊ ချေပဂိုးနတ္ထိ၊ စံချိန်ဆိုး၊ အိမ်ကွင်း၊ ပွဲဆက်ရှုံး၊ စပါး စတဲ့ တသီတသန်းတော့ နည်းလမ်းပေါင်းစုံးနဲ့အတူ ရှုံးခဲ့တာပါ။

မန်စီးတီးရဲ့ ပြဿနာနဲ့ အားနည်းချက်တွေကို စပြောရင် စပါးရဲ့ စွမ်းဆောင်မှုတွေကို အထင်သေးရာကျပါလိမ့်မယ်။ ဒါဟာ အနိုင်ယူမှုထက်ပိုတဲ့ ချေမှုန်းမှုပါ။ အန်ဂျီဟာ သိပ်မကြာသေးခင်မှာ မန်စီးတီးကို အနိုင်ယူထားပြီးပါပြီ၊ မနေ့ညကတော့ ဗျူဟာ၊ခြေစွမ်း၊ ရလဒ် သုံးမျိုးလုံးနဲ့ ချေမှုန်းခဲ့ပါတယ်။ ပြောချင်တာက မန်စီးတီး အားနည်းနေလို့ နိုင်တယ်ဆိုရုံလောက် ယူဆလိုက်ရင်မှားပါလိမ့်မယ်။ အန်ဂျီဟာ နိုင်ဖို့အတွက် သေချာပြင်ဆင်ခဲ့ပြီး၊ ကစားသမားတွေဟာ နိုင်ဖို့အတွက် အစွမ်းပြခဲ့တာမလို့ကို နိုင်တယ်လို့ စပြောရပါလိမ့်မယ်။

Tottenham Hotspur celebrate a 4-0 win over Manchester City

အန်ဂျီဟာ ခေါင်းမာပြီး၊ အလွန်အကျွံတိုက်စစ်သွားလွန်းတဲ့ ပုံစံအဖြစ်သတ်မှတ်ခံရသူပါ။ ဒီကိစ္စကလည်း စပါးရဲ့ ပြဿနာတစ်ခုလိုဖြစ်နေပြီး၊ တည်ငြိမ်ပြီးစိတ်ချရတဲ့ရလဒ်တွေရဖို့ ခက်နေခဲ့ပါတယ်။ ဒါပေမဲ့လည်း ဒီပွဲမှာတော့ အန်ဂျီဟာ ပက်ရဲ့ အသင်းကို အနိုင်ယူနည်း ဖော်မြူလာကို ကိုးကားဖြန့်ခင်းခဲ့ပါတယ်။ ဒီဖော်မြူလာကတော့ အားလုံးသိနိုင်လောက်မဲ့၊ ကွင်းလယ်ကို ကျစ်လစ်အောင်လုပ်၊ ကစားသမားတစ်ယောက်နဲ့တစ်ယောက်အကြားက အကွာအဝေးကို ခြုံထား၊ အစွန်နေရာကိုဟပေး၊ တောင်ပံက ခံစစ်ကူ။ ဒါက အခြေခံပါ။ ဒီအခြေခံကို အန်ဂျီက ယူသုံးလိုက်ပြီး၊ စပါးမှာတွေ့နေရတဲ့ အလွန်အကြူး ဖိအားပေးမှုအစား၊ ကျစ်လစ််မှု ဦးစားပေးတဲ့ လိုသလောက်ဖိအားပေးမှုကို ပြောင်းလိုက်တာပါပဲ။

နဂိုကတည်းကမှ ပြဿနာရှိနေတဲ့ မန်စီးတီးဟာ ဒီပုံစံနဲ့မှာ အခက်စတွေ့ခဲ့သလို၊ ဒီပုံစံကိုကစားနေတဲ့ စပါးကစားသမားတွေက သာမာန်ထက်ပိုတဲ့ စွမ်းဆောင်ရည်ကို ပြနေတဲ့အခါမှာ ဂိုးပြတ်ချေမှုန်းခံရတော့တာပါပဲ။ စပါးစရတဲ့ ဂိုးနှစ်ဂိုးဟာ ဂါဗီဒေါလ်ရဲ့ အမှားတွေကနေ စတယ်ဆိုပေမဲ့၊ ဒီလိုဖြစ်လာအောင် ဖိအားပေးနိုင်တာ၊ ဖြစ်လာတဲ့ အခွင့်အရေးကို အပီအပြင်အသုံးချလိုက်တာတွေကို ထည့်မတွက်လို့မရပါဘူး။

ဒီနေရာမှာ ဒုတိယဂိုးအကြောင်းလည်း ထည့်ပြောချင်ပါတယ်။ ဒီဂိုးမှာ ဆွန်ဟာ အတွင်းကို ဝင်လိုက်ပြီး၊ ကန်ဖို့ချိန်လိုက်ပါတယ်။ ဒီအချိန်မတိုင်ခင် ရှေ့မိနစ်လောက်ကလည်း ဆွန်က ဒီလိုလှမ်းကန်လိုက်ပါသေးတယ်။ ဒီအခိုက်အတန့်လေးမှာ မက်ဒီဆန်ကို ဆွန်နဲ့ ကြက်ခြေခတ်ပုံစံဖြတ်ထွက်သွားပြီး၊ မက်ဒီဆင်ကလည်း လက်ဟန်နဲ့ လှမ်းပြသလို၊ ဆွန်လည်း ရိပ်ခနဲလှမ်းတွေ့လိုက်ပါတယ်။ မန်စီးတီးကစားသမားတွေရဲ့ အာရုံက ဆွန်ဆီမှာပါ။ ဆွန်ဟာ မက်ဒီဆင် လှမ်းပေးလိုက်ပြီး ဂိုးဖြစ်စေခဲ့ပါတော့တယ်။ ဒါတွေ အားလုံးက စက္ကန့်ပိုင်းနည်းနည်းလေးမှာတင် ဖြစ်လိုက်တာဖြစ်ပြီး၊ ဒီအချိန်လေးမှာ လုပ်တဲ့ အရွေ့၊ ဒီအရွေ့ပေါ်မှာ လိုက်ချတဲ့ဆုံးဖြတ်ချက် ဒါတွေက သိပ်ကိုကောင်းလွန်းပါတယ်။ အထူးသဖြင့် ဆွန်ပါ။ ဒီကစားသမားရဲ့ ခြေစွမ်းကို ချီးကျူးတာက မဆန်းတော့ပေမဲ့၊ ဦးနှောက်ကလည်း ထိပ်တန်း ဘောလုံးဦးနှောက်ဆိုတာ မမေ့မလျော့ပြောရပါလိမ့်မယ်။ ဒီဂိုးကနေ ထပ်စဉ်းစားရင် အရှိန်သိပ်မြန်တဲ့ ပွဲတွေမှာ မီလီစက္ကန့်လေးတွေ အတွင်း ချလိုက်နိုင်တဲ့ ဆုံးဖြတ်ချက်တွေက သိပ်ကိုအရေးပါပါတယ်။ ပုံမှန်မြင်ကွင်းတွေအရဆို ဆွန်လိုနေရာမှာ များသောအားဖြင့် ကန်ထည့်လိုက်ကြတာများကြလေ့ရှိပါတယ်။

မန်စီးတီး Vs စပါး

မန်စီးတီးရဲ့ ဖိအားပေးနေမှုတွေကို စပါးဟာ ကွင်းဘေးစည်းမှာပဲ ကပ်ကစားရင်း ပုံစံအစုံနဲ့ကျော်ဖြတ်နေပါတယ်။ ပထမတစ်ဆင့် ဖိအားပေးတာကို ကျော်လိုက်တာနဲ့ မန်စီးတီးအတွက် ခြိမ်းခြောက်မှု တစ်ခုလို ပြန်ဖြစ်သွားပြီး၊ အဝေးပေးပို့မှုတွေကလည်း အဟောသိကံဖြစ်တာနည်းပါတယ်။ ဆွန်နဲ့ ကူလူဆက်စကီးဟာ နောက်ကို အတော်များများဆင်းပြီး မန်စီးတီး ဖိအားပေးမှုကို ကျော်ဖြတ်ဖို့ပါဝင်ခဲ့ကြသလို၊ ဆား၊ဘစ်ဆူးမားနဲ့ အူဒိုဂီတို့ အတွဲအဖက်ဟာ မန်စီးတီးကွင်းလယ်ကို လိုသလို ကစားသွားခဲ့ပါတယ်။

ဆိုတော့ကာ ဗျူဟာ၊ အကောင်အထည်ဖော်မှု၊ တစ်ယောက်ချင်းစီရဲ့ အစွမ်း သုံးခုလည်း ထပ်တူကျကောင်းမွန်နေခဲ့တဲ့ စပါးဟာ သူတို့နဲ့ထိုက်တန်တဲ့ ရလဒ်ကို ရခဲ့တော့တာပါပဲ။

မန်စီးတီးအပိုင်းကို ပြောရရင်တော့ ရိုဒရီပါခြင်းမပါခြင်းရဲ့ နောက်ဆက်တွဲကိစ္စတွေကို ဆက်ပြောရပါတော့မယ်။ မန်စီးတီးရဲ့ အားသာချက်ဟာ သူတို့ရဲ့ စနစ်လို့ပြောနိုင်ပြီး၊ ဘယ်အသင်းမှ မမီသေးတဲ့ အင်မတန်စည်းစနစ်ကျလည်ပတ်နေတဲ့ စနစ်တစ်ခုကို ပုံဖော်ထားနိုင်ပါတယ်။ ဒါပေမဲ့ တစ်ဖက်မှာလည်း သူတို့ရဲ့အားနည်းချက်ဟာ လည်း ဒီစနစ်ပဲလို့ပြောရပါတော့မယ်။ ဒီလိုစနစ်တစ်ခု အကောင်အထည်ဖော်ဖို့ ပက်ဟာ အချိန်ပေးတည်ဆောက်၊ စဉ်ဆက်မပြတ် ပုံသွင်းမွမ်းမံထားရပြီး၊ ကစားသမားတွေကိုယ်တိုင်လည်း ဒီစနစ်မှာ ပါဝင်ကစားဖို့ ပရိုဂရမ်ဆွဲထားသလို လေ့ကျင့်ထားရတယ်လို့တွေးကြည့်ပါစို့။ ဒီစနစ်က ပြဌာန်းထားတဲ့ လုပ်ဆောင်မှုတွေအပြင် အခြားတစ်ခုကို လုပ်ဖို့ ကစားသမားတွေကိုယ်တိုင် ခေါက်ရိုးကျိုးလာသလို ဖြစ်လာခဲ့ပြီး၊ မြင်သာအောင်ပြောရရင် ကြံရည်ဖန်ရည်ထက် ပုံသေနည်းအများကြီးဆန်နေပါတော့တယ်။ ဥပမာ ပြောရရင် စပါးက တိုက်စစ်စပြီဆိုတာနဲ့ လွတ်တဲ့နေရာကို လွန်းထိုး ပြေးလွှားနေပြီး၊ ပေးပို့မှုလုပ်မဲ့သူကလည်း အဲ့ဒီအချိန်မှာ အကောင်းဆုံးဖြစ်မဲ့ဟာကို လုပ်တယ်၊ ဖြစ်နေတဲ့အခြေအနေပေါ်မူတည်ပြီး ဘာလုပ်မလဲကို လွတ်လွတ်လပ်လပ် လုပ်နေကြတဲ့အချိန်မှာ မန်စီးတီးကတော့ ပုံသေနည်းဆန်နေဆဲပါပဲ။ ဒါဟာ မန်စီးတီးရဲ့ ဒင်္ဂါးပြားဖြစ်ပြီး၊ ဘယ်ဘက်ကျမလဲဆိုတာပေါ်မူတည်ပြီး ရလဒ်တွေ ပြောင်းနေတယ်ဆိုရမှာပါ။ 

ပက်ကိုယ်တိုင်လည်း သူတည်ဆောက်ထားတဲ့ စနစ်အပေါ်မှာ အစွဲကြီးပါတယ်။ အစွဲကြီးစေလောက်တဲ့ အကြောင်းပြချက်ကလည်း အခိုင်အမာရှိနေပြန်ပါတယ်။ တစ်ဖက်မှာလည်း မန်စီးတီးကစားသမားတွေဆိုတာ ဒီစနစ်မှာကစားနေလို့ကို ပိုကောင်းတာဆိုတဲ့ အတွေးလည်း တွေးနိုင်သေးတာမလို့ ဒီလိုမျိုး စနစ်အပေါ်မှာ အဓိကလည်ပတ်နေမှုကို အကောင်းအဆိုး ဝေဖန်နိုင်စွမ်း မရှိဘဲ၊ ပက် ကိုယ်တိုင်သာ ဖြေရှင်းရမဲ့ ကိစ္စပါပဲ။

အချုပ်မှာတော့ အန်ဂျီနဲ့ စပါးဟာ ပွဲကြို၊ ပွဲတွင်း ချီးကျူးရမဲ့ ကိစ္စတွေနဲ့အတူ ထိုက်တန်တဲ့ နိုင်ပွဲကို အရယူသွားခဲ့ပြီး၊ မန်စီးတီးကိုယ်တိုင်ဖြေရှင်းရမဲ့ ပြဿနာတွေကို အရှိန်မြှင့်ပေးခဲ့တာပါပဲ။

 

Credit – TotalSports [FB Page]

မန်စီးတီး Vs စပါး ဟိုက်လိုက်ကို ဒီမှာကြည့်နိုင်ပါပြီ။

မက်ဆီနဲ့ ရော်နယ်လ်ဒို တို့ရဲ့ ခြားနားချက်ကို ပြောလာတဲ့ ရိုဒရီ

မက်ဆီ နဲ့ ရော်နယ်လ်ဒို တို့ရဲ့ ခြားနားချက်အကြောင်းပြောလာတဲ့ ရိုဒရီ

မက်ဆီနဲ့ ရော်နယ်လ်ဒို တို့ရဲ့ ခြားနားချက်ကို ပြောလာတဲ့ ရိုဒရီ

၂၀၂၄ ဘာလွန်းဒေါဆုရှင် မန်ချက်စတာ စီးတီးအသင်းရဲ့ စပိန်ကွင်းလယ်ကစားသမား ရိုဒရီက သူ့အရှေ့က ဘာလွန်းဒေါ ဆုရှင်တွေဖြစ်တဲ့ လီယွန်နယ် မက်ဆီ နဲ့ ခရစ္စတီယာနို ရော်နယ်လ်ဒို တို့ရဲ့ ခြားနားချက်များအကြောင်းနဲ့ သူတို့တွေနဲ့ ရင်ဆိုင်ရချိန်မှာ ဘယ်ကစားသမားက သူ့အတွက် အခက်ခဲဆုံးလဲဆိုတာကို ပြောဆိုလာခဲ့ပါတယ်။

မက်ဆီ နဲ့ ရော်နယ်လ်ဒို တို့ဟာ ဘာလွန်းဒေါဆုကို အကြိမ်ရေ အများဆုံး ရယူထားကြသူတွေဖြစ်ပြီး မက်ဆီက (၈)ကြိမ်နဲ့ ရော်နယ်လ်ဒိုက (၅)ကြိမ် အထိ ပိုင်ဆိုင်နိုင်ခဲ့ရပေမယ့်လည်း အခု၂၀၂၄ ဘာလွန်းဒေါဆုရဲ့ အယောက် (၃၀) ဆန်ခါတင်စာရင်းမှာတော့ ဒီကစားသမားကြီး (၂)ဦးလုံး မပါဝင်နိုင်တော့ဘဲ ဖြစ်ခဲ့ရပါတယ်။ ရိုဒရီက​ အက်သလက်တီကို ဗီလာရီးရဲလ်တို့မှာ ကစားခဲ့တုန်းက မက်ဆီ ၊ ရော်နယ်လ်ဒို တို့နဲ့ ရင်ဆိုင်ခဲ့ရပါသေးတယ်။

“လီယွန်နယ် မက်ဆီဟာ ထာ၀ရ အကောင်းဆုံး ကစားသမားတစ်ဦးဆိုတာ လုံး၀ သံသယဝင်စရာ မရှိပါဘူး။ ခရစ္စတီယာနိုကတော့ မွေးရာပါ ပါရမီမပါဘဲနဲ့ မက်ဆီကို ယှဉ်ပြိုင်နိုင်ခဲ့တယ်။ ဒါပေမယ့် သူတို့တွေနဲ့ ယှဉ်ပြိုင်ကစားကြည့် လိုက်တဲ့ အခါမှာ ခြားနားမှုတွေကို မြင်လာနိုင်ပါတယ်။ ခရစ္စတီယာနိုက ဧရိယာထဲမှာ ကြောက်စရာကောင်းလွန်းလို့ သူ့ကို ဂိုးဧရိယာထဲ မဝင်စေချင်ပါဘူး။”

ရိုဒရီ ၊ မက်ဆီ ၊ ရော်နယ်လ်ဒို

“ဒါပေမယ့် မက်ဆီနဲ့သာ ယှဉ်ကစားနေရပြီဆိုရင်တော့ ကွင်းတစ်ကွင်းလုံး ရဲ့ နေရာတိုင်းမှာလိုလို အန္တရာယ်ရှိနေရတယ်။ မက်ဆီခြေထောက်ထဲ ဘောလုံးရောက်နေချိန်ဆို “ဟာ. . . ဒုက္ခပဲ” လို့ တွေးမိနေရမယ်။ သူနဲ့ ပထမဆုံး ယှဉ်ကစားခဲ့ရတုန်းကဆိုရင် ကျွန်တော် သူ့ဆီကနေ ဘောလုံးယူဖို့ ကြိုးစားခဲ့တုန်းက သူက အသာလေး ရှောင်တိမ်းသွားခဲ့တာ။ပြီးတာနဲ့ ဆိုးရွားတဲ့ အရာတစ်ခုဖြစ်ပေါ်လာတော့မယ်ဆိုတဲ့ ခံစားချက်မျိုးတွေပါ ခံစားမိလာရရော။” လို့ ရိုဒရီက ပြောဆိုသွားခဲ့ပါတယ်။

ဒါပေမယ့် ရိုဒရီဟာ goal.com နဲ့ ပြုလုပ်ခဲ့တဲ့ အင်တာဗျူးတစ်ခုမှာတော့ အမြဲတမ်းအကောင်းဆုံး ကစားသမားအဖြစ် မက်ဆီနဲ့ ရော်နယ်လ်ဒိုတို့ကို ကျော်ဖြတ်ပြီး သူ့ရဲ့ မန်စီးတီး အသင်းဖော် ကယ်လ်ဗင် ဒီဘရိုင်း ကိုသာ ရွေးချယ်ခဲ့ပါတယ်။

Turkish star arda guler

တူရကီ ကြယ်ပွင့်လေး ဂူလာ ကို အငှားနဲ့ ခေါ်ယူသွားမယ့် အာဆင်နယ်

အာဆင်နယ်အသင်းကတော့ ရီးယဲလ်မက်ဒရစ် အသင်းရဲ့ တူရကီ ကြယ်ပွင့်လေး ဂူလာ ကို လာမယ့် ဇန်နဝါရီ ဆောင်းရာသီ အပြောင်းအရွှေ့စျေးကွက်အတွင်းမှာပဲ ရာသီကုန်အထိ အငှားခေါ်ယူမှုနဲ့ ကမ်းလှမ်းသွားဖို့ ကြိုးပမ်းသွားဖွယ် ရှိနေတယ်လို့ သတင်းတွေ ထွက်ပေါ်လာခဲ့ပါတယ်။

အာဆင်နယ်ဟာ ရီးယဲလ် ကစားသမားတွေဖြစ်တဲ့ အိုဇေး အိုဒီဂတ် စီဘယ်ယို့စ် တို့ကိုလည်း ခေါ်ယူခဲ့ပြီး ဒီထဲကမှ နော်ဝေ ကွင်းလယ်ကစားသမား မာတင် အိုဒီဂတ်ကို အငှားကနေ အပြီးသတ် ခေါ်ယူနိုင်ခဲ့ရာ အခုဆိုရင် အိုဒီဂတ်က အာဆင်နယ်အတွက် အရေးအပါဆုံး ကစားသမားတစ်ဦးပါ ဖြစ်လာခဲ့ရပါတယ်။

Turkish star arda guler

အိုဒီဂတ်က အာဆင်နယ်ရဲ့ အသင်းခေါင်းဆောင် တစ်ဦးက အဓိက ကစားသမားတစ်ဦး ဖြစ်လာချိန်မှာ အာဆင်နယ်က အိုဒီဂတ် အပြောင်းအရွှေ့အတိုင်း နောက်ထပ် ရီးယဲလ် ကစားသမားတစ်ဦးဖြစ်တဲ့ ဂူလာကို ထပ်မံချဉ်းကပ်လာခဲ့ပြန်ပါတယ်။ အာဆင်နယ်က တူရကီ ကွင်းလယ်ကစားသမားလေး ဂူလာကို ရီးယဲလ်ကနေ ကာလတို အငှားစာချုပ်နဲ့ ခေါ်ယူသွားချင်နေပါတယ်။

အသက် (၁၉) နှစ်အရွယ်သာ ရှိသေးတဲ့ ဆယ်ကျော်သက် ကစားသမားလေး ဂူလာဟာ ကွင်းလယ်တိုက်စစ်နဲ့ တောင်ပံနေရာတွေမှာ ကစားတာဖြစ်ပြီး ၂၀၂၃ နွေကမှ တူရကီ ထိပ်သီးကလပ် ဖီနာဘာချီကနေ ရီးယဲလ်အသင်းဆီ (၆)နှစ် စာချုပ်တစ်ရပ်နဲ့ ပြောင်းရွှေ့လာခဲ့တာဖြစ်ပါတယ်။

arda guler

ပြီးခဲ့တဲ့ တစ်ရာသီလုံး ပြိုင်ပွဲစုံ (၁၂)ပွဲသာ ကစားထားရတဲ့ ဂူလာဟာ ဒီရာသီမှာလည်း လက်ရှိအချိန်ထိ (၁၂)ပွဲကစားထားရပေမယ့် (၁၂)ပွဲမှာ (၃)ပွဲသာ ပွဲထွက်ကစားသမားအဖြစ် ကစားထားရတဲ့ အပေါ် အနည်းငယ် စိတ်ပျက်နေရသလို ဒီအခြေအနေကိုလည်း ဥရောပထိပ်သီး ကလပ်အသင်းတွေက စောင့်ကြည့်လျက်ရှိနေကြပါတယ်။

ဒီလိုပွဲကစားခွင့် နည်းပါးနေတဲ့ ဂူလာကို အာဆင်နယ်အသင်းက ရာသီကုန်အထိ အငှားနဲ့ ခေါ်ယူချင်လာခဲ့ပြီး အာဆင်နယ်ဆိုတာကလည်း ဂူလာနှစ်သက်အားကျရတဲ့ အိုဇေးရဲ့ အသင်းဟောင်းလည်း ဖြစ်နေတာကြောင့် ကမ်းလှမ်းမှုသာ တကယ်ဖြစ်လာရင် လက်ခံလာနိုင်မလားဆိုတာ စိတ်ဝင်စားစရာဖြစ်နေရပါတယ်။ ဒါပေမယ့် ရီးယဲလ် နည်းပြကြီး အန်ဆယ်လော့တီ ကတော့ ဂူလာကို အသင်းမှာပဲ​ဆက်ထားပြီး ကစားခွင့်တွေ ပေးသွားဖွယ်လည်း ရှိနေပါတယ်။

Guardiola, who will remain as Manchester City coach until 2027

လာမယ့် ၂၀၂၇ ခုနှစ်အထိ မန်စီးတီး နည်းပြအဖြစ် ဆက်ရှိသွားတော့မယ့် ဂွါဒီယိုလာ

မန်ချက်စတာစီးတီးအသင်းရဲ့ နည်းပြကြီးဖြစ်သူ ပက်ပ် ဂွါဒီယိုလာ ဟာ ဒီနှစ် ဘောလုံးရာသီမကုန်ခင်မှာပဲ မန်စီးတီးနဲ့ ချုပ်ဆိုထားတဲ့ စာချုပ်သက်တမ်းက ကုန်ဆုံးတော့မှာဖြစ်ပေမယ့် စာချုပ်ထဲမှာ ပါဝင်နေတဲ့ တစ်နှစ်ထပ်မံ သက်တမ်းတိုးခွင့်ကို အသက်သွင်းပြီး ၂၀၂၇ ခုနှစ်အထိ အသင်းမှာ ဆက်ရှိနေတော့မှာပဲဖြစ်ပါတယ်။

အသက်(၅၃)နှစ်အရွယ် ရှိနေပြီဖြစ်တဲ့ နာမည်ကျော် ဘောလုံးနည်းပြကြီး ဂွါဒီယိုလာဟာ ဘာစီလိုနာ ဘိုင်ယန်မြူးနစ်တို့နဲ့ အောင်မြင်မှုတွေ ရယူနိုင်ခဲ့သလို မန်စီးတီးမှာလည်း စံချိန်တင် အောင်မြင်မှုတွေအထိ ဆောင်းကြဉ်းပေးနိုင်ခဲ့တဲ့ ဘောလုံးနည်းပြတွေထဲကမှ GOAT တစ်ဦးလို့ပါ တင်စားရလောက်တဲ့ နည်းပြမျိုးဖြစ်ပါတယ်။

Guardiola, who will remain as Manchester City coach until 2027

လွန်ခဲ့တဲ့ ၂၀၁၆ ကတည်းက မန်စီးတီးအသင်းဆီ ရောက်ရှိနေတဲ့ ဂွါဒီယိုလာဟာ မန်စီးတီးအတွက် သမိုင်းဝင် အောင်မြင်မှုတွေ ဆက်တိုက် ရယူပေးနိုင်ခဲ့လို့ အသင်းဘက်က သူ့ကို လုံး၀လက်မလွတ်ချင်ဘဲ ဖြစ်နေပါတယ်။ ဒါပေမယ့်လည်း ဂွါဒီယိုလာက စာချုပ်သက်တမ်းနောက်ဆုံးနှစ် ရောက်လာချိန်မှာတော့ ကောလဟာကတွေက အဆက်မပြတ် ထွက်ပေါ်လာခဲ့ပါတယ်။

ဂွါဒီယိုလာက မန်စီးတီးထွက်ခွာပြီး ဘယ်အသင်းကို ပြောင်းတော့မယ်ဆိုတဲ့ ကောလဟာလတွေ ထွက်နေသလို မန်စီးတီးကလည်း ဂွါဒီယိုလာခေတ်အလွန်မှာ ဘယ်နည်းပြကို ခန့်အပ်သွားဖို့ ချိန်ရွယ်နေတယ်ဆိုတဲ့ သတင်းတွေလည်းထွက်ပေါ်နေခဲ့ပါတယ်။

ဂွါဒီယိုလာ

အခု The Athletic သတင်းမီဒီယာကြီးရဲ့ ဖော်ပြချက်များအရ မန်စီးတီးဟာ နည်းပြ ဂွါဒီယိုလာနဲ့ ချုပ်ဆိုထားတဲ့ စာချုပ်ပါ အချက်အလက်မှာ ပါဝင်တဲ့ (၁)နှစ် သက်တမ်းတိုးခွင့်ကို အသုံးပြုသွားဖို့ သဘောတူညီမှု ရရှိသွားခဲ့ပြီလို့ ဖော်ပြလာပါတယ်။ ဒါကြောင့် ဂွါဒီယိုလာဟာ လာမယ့် ၂၀၂၇ ခုနှစ်အထိ မန်စီးတီးနည်းပြအဖြစ် ဆက်ရှိနေတော့မှာဖြစ်ပါတယ်။

မန်စီးတီးဘက်ကလည်း သူတို့အသင်းကို အောင်မြင်မှုတွေ အမြောက်အများ ရယူပေးခဲ့တဲ့ ဂွါဒီယိုလာကို အသင်းမှာ ရအောင်ထိန်းထားနိုင်ဖို့အတွက်သာ ကြိုးပမ်းနေခဲ့တာဖြစ်ပြီး တခြားသော နည်းပြတွေနဲ့ ဆက်သွယ်ခြင်း ချိတ်ဆက်ခြင်းတွေ လုံး၀မရှိခဲ့ဘူးလို့လည်း သိရပါတယ်။

နိုဝင်ဘာ ၀၈ ပွဲကြိုသုံးသပ်ချက်

နိုဝင်ဘာ ၀၈ ပွဲကြိုသုံးသပ်ချက်

နိုဝင်ဘာ ၀၈ ပွဲကြိုသုံးသပ်ချက်

နိုဝင်ဘာ ၀၈ ရက် ညမှာကန်မယ့် ချန်ပီယံလိဒ်ပွဲစဉ်ကောင်း များဖြစ်တဲ့

  • ဗယ်လီကာနို [Vs] လက်စ်ပါးမက်စ် – SPAIN LALIGA
    [မြန်မာစံတော်ချိန် နံနက် ၀၂း၃၀ နာရီ ၊ နိုဝင်ဘာ ၉]
  • လက်ချီ [Vs] အမ်ပိုလီ – Italy Serie A
    [မြန်မာစံတော်ချိန် နံနက် ၀၂း၁၅ နာရီ ၊ နိုဝင်ဘာ ၉]
  • ယူနီယံဘာလင် [Vs] ဖရန့်ဖတ် – BUNDESLIGA
    [မြန်မာစံတော်ချိန် နံနက် ၀၂း၀၀ နာရီ ၊ နိုဝင်ဘာ ၉]
  • မာဆေးလ် [Vs] အော်ဇေး – LIGUE 1
    [မြန်မာစံတော်ချိန် နံနက် ၀၂း၁၅ နာရီ ၊ နိုဝင်ဘာ ၉]

တို့ရဲ့ ပွဲကြိုသုံးသပ်ချက်

Royal Vallecano [Vs] Las Palmas

[မြန်မာစံတော်ချိန် နံနက် ၀၂း၃၀ နာရီ ၊ နိုဝင်ဘာ ၉]

ဗယ်လီကာနို [Vs] လက်စ်ပါးမက်စ် - SPAIN LALIGA

ဇယားအလယ်က ဗယ်လီကာနိုဟာ ပြီးခဲ့တဲ့ အပတ်က ဗီလာရီးရဲလ်နဲ့ ပွဲပြတ်ထားခဲ့သလို ပြိုင်ပွဲစုံ နောက်ဆုံး (၈)ပွဲမှာ အဝေးကွင်း (၁)ပွဲသာ ရှုံးထားတဲ့ သူတို့အသင်းဟာ အိမ်ကွင်းရုန်းကန်မှုအားနဲ့ ဘာစီလိုနာ တစ်သင်းကိုသာ ရှုံးထားပြီး အိမ်ကွင်းပွဲတိုင်း ဂိုးသွင်းထားပါတယ်။

တန်းဆင်းဇုန်ထဲက လက်စ်ပါးမက်စ်တို့ ပြိုင်ပွဲစုံနောက်ဆုံး (၄)ပွဲမှာ (၃)ပွဲဆက် နိုင်ပွဲတွေ့ထားခဲ့ပေမဲ့ တီကို အိမ်ကွင်းမှာ ဂိုးပြတ်ရှုံးပွဲပြန်တွေ့ခဲ့တာမို့ တန်းဆင်းဇုန်ထဲက ရုန်းမထွက်နိုင်သေးပါဘူး။ ဗယ်လီကာနိုဟာ လက်စ်ပါးမက်စ်နဲ့ အိမ်ကွင်းတွေ့ဆုံမှု နောက်ဆုံး (၅)ပွဲမှာ (၁)ပွဲသာ ရှုံးနိမ့်ခဲ့သလို ဒီရာသီအဝေးကွင်း (၆)ပွဲမှာလည်း (၅)ပွဲ ရှုံးထားပါတယ်။ သေချာပေါက် အိမ်ရှင်အရိပ်အောက် ခိုလှုံရမှာပါ။

ရွေးချယ်မှု - ဗယ်လီကာနို

Lecce [Vs] Empoli

[မြန်မာစံတော်ချိန် နံနက် ၀၂း၁၅ နာရီ ၊ နိုဝင်ဘာ ၉]

လက်ချီ [Vs] အမ်ပိုလီ - Italy Serie A

ရဲရဲနီ ရှုံးပွဲအောက်က အိမ်ကွင်းနိုင်ပွဲတွေ့ထားခဲ့တဲ့ လက်ချီဟာ ပြီးခဲ့တဲ့ အပတ်က ဘိုလော့ဂ်နာ အိမ်ကွင်းမှာ ရှုံးပွဲပြန်တွေ့ခဲ့တာမို့ သူတို့ရဲ့ အပျော်ဟာ (၃)ရက်သာ ခံခဲ့တယ်။ တန်းဆင်းဇုန်အောက်ဆုံးက လက်ချီရဲ့ တိုက်စစ်ကလည်း ဒီရာသီအိမ်ကွင်း ဂိုးသွင်းထားတဲ့ (၄) ဂိုးသာ ရသေးပါတယ်။

နောက်ဆုံး စီးရီးအေ (၆)ပွဲမှာ (၅)ပွဲဆက် နိုင်ပွဲပျောက်ဆုံးခဲ့တဲ့ အိမ်ပိုလီတို့ နိုင်ပွဲတွေ့ခဲ့သလို ဒီရာသီ အဝေးကွင်းရှုံးပွဲကလည်း လာဇီယိုတစ်သင်းကိုသာ ရှုံးနိမ့်ထားပါတယ်။ သူတို့ (၂)သင်းထိပ်တိုက်တွေ့ဆုံထားတိုင်း ဂိုးအောက်အများဆုံး ကစားထားတာမို့ ဂိုးအောက်ကသာ အကောင်းဆုံးပါ။

ရွေးချယ်မှု - ဂိုးအောက်

Union Berlin [Vs] Freiburg

[မြန်မာစံတော်ချိန် နံနက် ၀၂း၀၀ နာရီ ၊ နိုဝင်ဘာ ၉]

ယူနီယံဘာလင် [Vs] ဖရန့်ဖတ် - BUNDESLIGA

(၁)မှတ်သာ ကွာတဲ့ အဆင့် (၆)နဲ့ (၇)တွေ့ဆုံမှုဖြစ်ပြီး ဘွန်ဒတ်လီဂါ နောက်ဆုံး (၄)ပွဲမှာ ဘိုင်ယန်တစ်သင်းကိုသာ ရှုံးထားတဲ့ ယူနီယံဘာလင်ရဲ့ လက်ရှိခြေစွမ်းဟာ အားရစရာရှိပြီး အိမ်ကွင်းမရှုံးပဲ (၄)ပွဲမှာ (၃)ပွဲ နိုင်ထားပါတယ်။

လိုက်ပ်ဇစ်ကို ရှုံးပြီး မိန့်ဇ်ကို သရေကျထားခဲ့တာမို့ အဆင့် (၆)နေရာထိ ဆင်းပေးလိုက်ရတဲ့ ဖရိုင်းဘတ်ရဲ့ ခြေဟာ မတည်ငြိမ်သေးသလို နည်းပြသစ်လက်ထက်မှာ တက်လိုက်ကျလိုက်ဖြစ်နေပါတယ်။ ဒါ့အပြင် ဖရိုင်းဘတ်ဟာ ယူနီယံ ဘာလင် အိမ်ကွင်းသွားကစားထားတဲ့ (၅)ပွဲမှာလည်း မနိုင်ထားခဲ့ပါဘူး။ အပြန်အလှန် ဂိုးသွင်းလာနိုင်ခြေရှိတဲ့ ပွဲမို့ ဂိုးပေါ်ကို စွန့်စားကြည့်မယ်။

ရွေးချယ်မှု - ဂိုးပေါ်

Marseille [Vs] Auxerre

[မြန်မာစံတော်ချိန် နံနက် ၀၂း၁၅ နာရီ ၊ နိုဝင်ဘာ ၉]

မာဆေးလ် [Vs] အော်ဇေး - LIGUE 1

အဆင့် (၂) နေရာက မာဆေးလ်က ဒီရာသီ (၂)ပွဲရှုံးနိမ့်ခဲ့တာမို့ ထိပ်ဆုံးက ပီအက်စ်ဂျီနဲ့ (၆)မှတ် ပြတ်သွားတဲ့ မာဆေးလ်ရဲ့ အိမ်ကွင်းခြေဟာ (၁)ပွဲသာ နိုင်ပွဲရထားသေးပါတယ်။ နည်းပြ ဒီဇာဘီလက်ထက် ခြေမငြိမ်သေးသလို လီဂူးနောက်ဆုံး (၅)ပွဲမှာ (၂)ပွဲသာ နိုင်ထားပါတယ်။

ဇယားအလယ်ကအော်ဇေးတို့ အဝေးကွင်း နိုင်ပွဲ မရှိသေးပါဘူး။ နောက်ဆုံး (၃)ပွဲမှာ အိမ်ကွင်း (၂)ပွဲနိုင်ခဲ့သလို လိုင်ယွန်အိမ်ကွင်းမှာ သရေကစားထားနိုင်ခဲ့တာမို့ အဝေးကွင်း ရှုံးပွဲဆက်နေမှုကို ရပ်တန့်နိုင်ခဲ့တဲ့ အော်ဇေးဟာ မာဆေးလ်အိမ်ကွင်းမှာတော့ သရေကစားဖို့ကို မလွယ်ပါဘူး။ အိမ်ကွင်း အရှုံးက ပြန်ရုန်းထမယ့် မာဆေးလ်ကို ပိုကြိုက်ပါတယ်။

ရွေးချယ်မှု - မာဆေးလ်
Lamine Yamal - 2024 Kopa Trophy

ဘာလွန်းဒေါဆုကို အမြန်ဆုံး ဆွတ်ခူးနိုင်ဖို့ မျှော်လင့်နေတယ်လို့ ဆိုလိုက်တဲ့ ယာမားလ်။

၂၀၂၄ ဘာလွန်းဒေါဆု ပေးပွဲမှာ တစ်နှစ်တာ လူငယ်အကောင်းဆုံး ဘောလုံးသမားဆု Kopa Trophy ဆုကို ဆွတ်ခူးနိုင်ခဲ့တဲ့ ဘာစီလိုနာအသင်းရဲ့ စပိန် ဆယ်ကျော်သက် တောင်ပံကစားသမားလေး လာမင်း ယာမားလ်က သူ့အနေနဲ့ ဘာလွန်းဒေါဆုကို အမြန်ဆုံး ဆွတ်ခူးနိုင်ဖို့ မျှော်လင့်ထားတယ်လို့ ဖွင့်ဟ သွားခဲ့ပါတယ်။

Lamine Yamal - 2024 Kopa Trophy

အသက် (၁၇)နှစ် အရွယ်သာ ရှိနေသေးတဲ့ စပိန်လက်ရွေးစင် ညာတောင်ပံ ကစားသမားလေး ယာမားလ်ဟာ ဘာစီလိုနာအသင်းရဲ့ နာမည်ကျော် လာမာစီယာ အကယ်ဒမီထွက်တစ်ဦး ဖြစ်ပြီး ဘာစီလိုနာ စီနီယာ အသင်းအတွက် စတင် ကစားပေးခွင့်ရှိချိန်မှာ ယာမားလ်ရဲ့ အသက်က (၁၅) နှစ်ကျော်ကျော်လေးသာ ရှိနေပါတယ်။

အသက်ငယ်ငယ်လေးနဲ့ ဘာစီလိုနာအတွက် ကစားပေးခွင့်ရရှိရင်း စပိန်လက်ရွေးစင် အသင်းမှာပါ ရွေးချယ်ခံလာရတဲ့ ယာမားလ်က ၂၀၂၄ ယူရို ပြိုင်ပွဲကြီးမှာလည်း စပိန်အသင်းကို ယူရို ချန်ပီယံ ဖြစ်အောင် အကောင်းဆုံး စွမ်းဆောင်ပေးခဲ့သလို ဘာစီလိုနာအတွက်လည်း အမြဲတမ်း ပါဝင် ကစားရသူပါဖြစ်လာခဲ့ပါတယ်။

ဒီလိုအသက်အရွယ်နဲ့ မလိုက်အောင်် ခြေစွမ်းပြသနေတဲ့ ယာမားလ်ဟာ ၂၀၂၄ ရဲ့ Kopa Trohy အကောင်းဆုံး လူငယ်ကစားသမား ဆုကို ပါ ဆွတ်ခူးနိုင်ခဲ့ပြီ ဖြစ်သလို ၂၀၂၄ ဘာလွန်းဒေါ အဆင့်သတ်မှတ်ချက်မှာ ဆိုရင်လည်း နာမည်ကျော် ကစားသမားကြီးတွေကိုပါ ကျော်ဖြတ်ပြီး အဆင့်(၈) နေရာထိတောင် ရပ်တည်နိုင်ခဲ့ပါတယ်။

Lamine Yamal win 2024 Kopa Trophy

ယာမားလ်ကို တစ်နိုင်ငံတည်းသားလည်းဖြစ် ၂၀၂၄ ဘာလွန်းဒေါ ဆုရှင်လည်းဖြစ် ရိုဒရီက “မကြာခင်မှာပဲ လာမင်းယာမားလ်က ဘာလွန်းဒေါ ဆိုကို ရလိမ့်မယ်ဆိုတာ ကျွန်တော်ယုံကြည်ပါတယ်။ ဆက်ကြိုးစားနေပါ တစ်နေ့ကျရင် မင်း ဒီနေရာကို ရောက်လာမှာပါ။” လို့ အားပေးစကား ပြောကြားသွားခဲ့ပါသေးတယ်။

ယာမားလ်ကိုယ်တိုင်ကလည်း ” ဟုတ်တယ်။ ဘာလွန်းဒေါဆုကို အမြန်ဆုံး ဆွတ်ခူးနိုင်ဖို့ ကျွန်တော် မျှော်လင့်ပါတယ်။ဒါက ကျွန်တော့်စိတ်ထဲမှာ ရှိနေမယ့် အရာပါပဲ။။ ဒီအရာကို ၇အောင် ယူဆောင်သွားမယ်။”လို့ ကြုံးဝါးပြောဆိုသွားခဲ့ပါတယ်။ ယာမားလ်သာ ဘာလွန်းဒေါဆု ရခဲ့မယ်ဆိုရင် ဘာလွန်းဒေါဆု သမိုင်းတစ်လျှောက် အသက်အငယ်ဆုံး ဘာလွန်းဒေါဆုရှင် ဖြစ်ထားတဲ့ ရော်နယ်လ်ဒို နာဇာရီယိုရဲ့ စံချိန်ကိုပါ ကျော်ဖြတ်နိုင်မှာပဲဖြစ်ပါတယ်။ ရော်နယ််လ်ဒိုကြီးက အသက် (၂၁)နှစ်နဲ့ ဘာလွန်းဒေါဆုရှင် ဖြစ်ခဲ့တာလည်းဖြစ်ပါတယ်။

Rodri - 2024 Men's Ballon d'Or winner

၂၀၂၄ ဘာလွန်ဒေါ ဆုရှင်များ

(2024) Ballon d'Or ဆုရှင် 𝐑𝐨𝐝𝐫𝐢

Rodri - 2024 Men's Ballon d'Or winner

၂၀၂၄ခုနှစ် တစ်နှစ်တာရဲ့ ကမ္ဘာ့အကောင်းဆုံး အမျိုးသား ဘောလုံးသမားဆု 2024 Men’s Ballon d’Or ဆုကို စပိန် နှင့် မန်ချက်စတာစီးတီး ကွင်းလယ်ကစားသမား ရိုဒရီ က ဆွတ်ခူးသွားခဲ့ပါတယ်။

2024 WOMEN’S BALLON D’OR!!!

Aitana Bonmatí - 2024 Women's Ballon d'Or

၂၀၂၄ခုနှစ် တစ်နှစ်တာရဲ့ ကမ္ဘာ့အကောင်းဆုံး အမျိုးသမီး ဘောလုံးသမားဆု 2024 Women’s Ballon d’Or ဆုကို ဘာစီလိုနာအသင်းရဲ့ စပိန် ကွင်းလယ်ကစားသမား ဘွန်မာတီက (၂)နှစ်ဆက်တိုက် ဆွတ်ခူးသွားခဲ့ ပါတယ်။

Men's Johan Cruyff Trophy!!!

Carlo Ancelotti - Men's Johan Cruyff Trophy

      ၂၀၂၄ခုနှစ် တစ်နှစ်တာရဲ့ ကမ္ဘာ့အကောင်းဆုံး အမျိုးသား နည်းပြဆု Men’s Johan Cruyff Trophy ဆုကို ရီးယဲလ် မက်ဒရစ်အသင်းရဲ့ နည်းပြကြီး ကားလို့ အန်ဆယ်လော့တီက ဆွတ်ခူးသွားခဲ့ ပါတယ်။ 

2024 Yashin Trophy

Emiliano Martínez - 2024 Yashin Trophy

၂၀၂၄ခုနှစ် တစ်နှစ်တာရဲ့ ကမ္ဘာ့အကောင်းဆုံး ဂိုးသမားဆု 2024 2024 Yashin Trophy ဆုကို အက်စတွန် ဗီလာအသင်းရဲ့ အာဂျင်တီးနား အယ်လ်မီလီယာနို မာတီနက်ဇ်က (၂)နှစ်ဆက်တိုက် ဆွတ်ခူးသွားခဲ့ပါတယ်။ 

2024 Gerd Müller Trophy

Harry Kane & Kylian Mbappé Gerd Müller Trophy

  ၂၀၂၄ခုနှစ် တစ်နှစ်တာရဲ့ ကမ္ဘာ့အကောင်းဆုံး တိုက်စစ်ကစားသမားဆု 2024 Gerd Müller Trophy ဆုကို ဘိုင်ယန်မြူးနစ်ရဲ့ အင်္ဂလန် တိုက်စစ်မှူး ဟယ်ရီကိန်းနဲ့  ရီးယဲလ် မက်ဒရစ်ရဲ့  ပြင်သစ် တိုက်စစ်ကစားသမား ကီလီယန် အမ်ဘာပေတိုက ပူးတွဲ ဆွတ်ခူးသွားခဲ့ ပါတယ်။ 

Men's Club of The Year

Men's Club of The Year - Real Madrid

၂၀၂၄ခုနှစ် တစ်နှစ်တာရဲ့ ကမ္ဘာ့အကောင်းဆုံး အမျိုးသား ဘောလုံးကလပ်အသင်းဆုကို ပြီးခဲ့တဲ့ ၂၀၂၃-၂၀၂၄ ရာသီက ချန်ပီယံလိဂ် ၊ လာလီဂါနဲ့ စပိန်စူပါဖလားတိုကို ရယူနိုင်ခဲ့တဲ့ ရီးယဲလ် မက်ဒရစ်အသင်းက ဆွတ်ခူးသွားခဲ့ ပါတယ်။

2024 Kopa Trophy

Lamine Yamal - 2024 Kopa Trophy

၂၀၂၄ခုနှစ်ရဲ့ ကမ္ဘာ့အကောင်းဆုံး လူငယ်ကစားသမားဆု 2024 Kopa Trophy ကို ဘာစီလိုနာအသင်းရဲ့ စပိန် လူငယ် တောင်ပံကစားသမားလေး လာမင်း ယာမားလ်က ဆွတ်ခူးရရှိသွားခဲ့ ပါတယ်။

Rubin Diaz says his teammate Rodri should win the Ballon d'Or

ဘာလွန်ဒေါ ဆုကိုအသင်းဖော် ရိုဒရီသာ ဆွတ်ခူးသင့်တယ်လို့ ရူဘင်ဒီးယက်စ်ဆို

Rubin Diaz says his teammate Rodri should win the Ballon d'Or

ဒီကနေ့မှာပဲ ချီးမြှင့်သွားတော့မယ့် ၂၀၂၄ ဘာလွန်းဒေါ ဆုအတွက် အထိုက်တန်ဆုံး ကစားသမားဟာ သူ့ရဲ့ မန်ချက်စတာစီးတီး အသင်းဖော် စပိန် ကွင်းလယ်ကစားသမား ရိုဒရီသာ ဖြစ်သင့်တယ်လို့ မန်စီးတီး နောက်ခံကစားသမား ရူဘင် ဒီးယက်စ်က မှတ်ချက် ပြု ပြောဆိုသွားခဲ့ပါတယ်။

၂၀၂၄ ဘာလွန်းဒေါဆု ကမ္ဘာ့အကောင်းဆုံး ဘောလုံးသမားဆုအတွက် ရီးယဲလ် မက်ဒရစ် ကစားသမားတွေဖြစ်တဲ့ ဗင်နီစီယပ်စ် နဲ့ ဘယ်လင်ဂမ် မန်စီးတီး ကွင်းလယ်ကစားသမား ရိုဒရီတို့က အပြိုင်ရေပန်းစားနေကြတာဖြစ်ပြီး ဒီကစားသမား (၃) ဦးထဲမှာဆိုရင်လဲ ဘရာဇီးလ်ကြယ်ပွင့် ဗင်နီစီယပ်စ်က ရေပန်းအစားဆုံးဖြစ်နေပါတယ်။

Rhodey Vinicius Bellingham

လက်ရှိမှာဆိုရင်လည်း ရိုဒရီက ACL ဒဏ်ရာဆိုးကြီးပါ ရရှိခံစားနေရပေမယ့် ပြီးခဲ့တဲ့ ရာသီတုန်းကတော့ မန်စီးတီးနဲ့အတူ ပရီးမီးယားလိဒ်ဖလားအပြင် စပိန်အသင်းနဲ့အတူ ၂၀၂၄ ယူရိုပါ ဖလားကြီးကိုပါ ပိုင်ဆိုင်နိုင်ခဲ့ပြီး ဒါဟာ ရီးယဲလ်နဲ့သာ ဖလားတွေရယူထားနိုင်တဲ့ ဗင်နီစီယပ်စ် ဘယ်လင်ဂမ်တို့ထက် ပိုသာလွန်နေပါတယ်။လတ်တလော ရေပန်းစားနေတဲ့ အတိုင်း ရီးယဲလ်အသင်းရဲ့ တိုက်စစ်ကစားသမား ဗင်နီစီယပ်စ်သာ ၂၀၂၄ ဘာလွန်းဒေါဆုရှင် ဖြစ်လာနိုင်ဖို့ အခြေအနေ အများဆုံးဖြစ်နေပါတယ်။

ဒါပေမယ့် မန်စီးတီး ခံစစ်မှူး ဒီးယက်စ်ကတော့ အသင်းဖော် ရိုဒရီနဲ့ ပါတ်သက်ပြီး “ရိုဒရီကသာ ဘာလွန်းဒေါဆုကို ဆွတ်ခူးသင့်ပါတယ်။ သူက အထင်ကြီးလောက်စရာကောင်းတဲ့ ဘောလုံးရာသီ တစ်ခုကို ပိုင်ဆိုင်ခဲ့ရတာပါ။ ဖလားကိုမှ တစ်ခုတည်း ရခဲ့တာမဟုတ်ပါဘူး။ တစ်ရာသီအတွင်းမှာပဲ ဖလား အများကြီးရခဲ့တာပါ။”

Rodrigo and Dias

 

“သူက ယူရိုဖလားကိုလည်း ဆွတ်ခူးခဲ့သေးတာ။ဒါမျိုးက ဘောလုံးမျိုးဆက်တိုင်းမှာ မြင်တွေ့ရတာမျိုးမဟုတ်တဲ့ အောင်မြင်မှုမျိုးပါ။ နောက်ပြီးတော့ သူဟာ အထူး စပါယ်ရှယ် ကစားသမားတစ်ဦးဖြစ်ဖြစ်တယ်ဆိုတာကို လည်း လုံး၀ သံသယ မရှိပါဘူး။” လို့ မှတ်ချက် ပြု ပြောကြားသွားခဲ့ပါတယ်။ လက်ရှိမှာတော့ ရိုဒရီက သူ့ရဲ့ ACL ဒဏ်ရာဆိုးကြောင့် အခု ဘောလုံးရာသီ တစ်လျှောက်လုံး မန်စီးတီးနဲ့ စပိန်ပွဲစဉ်တွေကို လွှဲချော်ရတော့ မှာဖြစ်ပါတယ်။

Wayne rooney and Ten Hag

တန်ဟက်ဂ်က ကောင်းမွန်တဲ့ နည်းပြ တစ်ဦးလို့ ဆိုလိုက်တဲ့ ရွန်းနီ

Wayne rooney and Ten Hag

မန်ချက်စတာ ယူနိုက်တက်အသင်းရဲ့ ဂန္တဝင် ကစားသမားဟောင်းကြီး ဝိန်းရွန်းနီက လက်ရှိ ယူနိုက်တက် နည်းပြ အဲရစ် တန်ဟက်ဂ်ကို ကောင်းမွန်တဲ့ နည်းပြတစ်ဦးဆိုပြီး အားပေးထောက်ခံမှုတွေ လုပ်ဆောင်ခဲ့ရင်း ကစားသမားတွေက ဒီထက်မက ပိုမိုကောင်းမွန်အောင် ကြိုးစားဖို့ လိုအပ်တယ်လို့ သတိပေးသွားခဲ့ပါတယ်။

ဂန္တဝင် ကစားသမားကြီးဖြစ်တဲ့ ရွန်းနီဟာ လက််ရှိမှာတော့ နည်းပြတစ်ဦးအဖြစ် လုပ်ကိုင်ဆောင်ရွက်လျက် ရှိပြီး ပလိုင်းမောက်အသင်းကို ကိုင်တွယ်နေပါတယ်။လက်ရှိ ပရီးမီးယားလိဒ်ပြိုင်ပွဲမှာ အဆင့် (၁၄)ထိတောင် ရောက်ရှိလို့နေတဲ့ အသင်းဟောင်း ယူနိုက်တက်က တန်ဟက်ဂ်ရဲ့ အနာဂတ်ပါ လှုပ်ခတ်လာရတဲ့အကြောင်းကို သူရဲ့ ထင်မြင်ချက်တွေနဲ့ မှတ်ချက်ပြုပြောဆိုလာခဲ့ပါတယ်။

“ဒီလိုအခြေအနေကို သေချာကြည့်ရှုဖို့ဆိုတာ ဘောလုံးအသင်းပိုင်ရှင်တွေအပေါ်မှာ မူတည်ပါတယ်။ အဲရစ် တန်ဟက်ဂ်ဟာ ကောင်းမွန်တဲ့ နည်းပြ တစ်ဦးဆိုတာ သေချာပါတယ်။ သူက ဘယ်အသင်းမှာပဲ ဖြစ်ဖြစ် ဆုဖလားတွေ ဆွတ်ခူးနိုင်ခဲ့သလို မန်ချက်စတာ ယူနိုက်တက်မှာလည်း ဆုဖလားတွေ ဆွတ်ခူးထားခဲ့ပါသေးတယ်။

Wayne Rooney with Ten Hag
“အခုကတော့ သူက ခက်ခဲတဲ့ ကာလတစ်ခုကို ဖြတ်သန်းနေရပြီး သူကိုယ်တိုင်လည်း ဒီလိုပြောနိုင်မယ်လို့ ထင်ပါတယ်။ ဒါပေမယ့် ဒီအခြေအနေတွေကို သူပြောင်းလဲနိုင်မယ်လို့ မျှော်လင့်ရပါမယ်။ ဘာကြောင့်လဲဆိုတော့ နည်းပြတွေက မကြာခဏ သူတို့အလုပ်တွေကို ဆုံးရှုံးနေရပြီးတော့ ပြီးရင်လည်း ပုံစံမတူတဲ့ တခြားနည်းပြတစ်ဦးနဲ့ အသင်းကို ပြန်တည်ဆောက်ရတာကြောင့်ပါ။”

 

“ဒါက ခက်ခဲပါတယ်။ နောက်ပြီးတော့ အသင်းအနေနဲ့လည်း အဆင့် (၁၄)ကိုရောက်နေသည့်တိုင် ချန်ပီယံဆုကို စိန်ခေါ်ချင်တယ်လို့ ဘယ်သူမဆို ဝန်ခံမှာပါ။ ကလပ်အသင်းမှာ ရှိနေတဲ့ လူတိုင်းက တိုးတက်ဖို့ လိုအပ်နေတယ်ဆိုတာ သိထားကြပါတယ်။”

 

“အဲရစ် တန်ဟက်ဂ်ကလည်း သူတတ်နိုင်သမျှကြိုးစားပြီး တိုးတက်အောင် လုပ်နိုင်တယ်ဆိုတာ ကျွန်တော်သိပါတယ်။ ကစားသမားတွေကတော့ ထပ်ပြီးပြောရရင် ပြီးခဲ့တဲ့ ရာသီက သူတို့လုပ်ခဲ့တာတွေထက် ပိုကောင်းအောင် လုပ်ဖို့လိုနေတယ်ဆိုတာကို ကျွန်တော်ပြောခဲ့တယ်။ ပြီးခဲ့တဲ့ နှစ်တွေအတွင်းမှာလည်း ကစားသမားတွေရဲ့ အပြောင်းအလဲက ကြီးမားခဲ့တယ်။ ကစားသမားတွေ အချင်းချင်း ပြိုင်ဆိုင်နေကြတာကိုပဲ အားလုံးက မြင်ချင်ကြမှာပါ။” လို့ ရွန်းနီက မှတ်ချက်ပြုပြောဆိုလိုက်ပါတယ်။